აუდიტორულმა და საკონსულტაციო კომპანია AGIC-მ რძის პროდუქტების ინდუსტრიის კვლევა ჩაატარა, რომელიც ემსახურება რძის პროდუქტებით ვაჭრობისა და წარმოების ინდუსტრიაში არსებული ტენდენციების გამოვლენას, პირველი, მეორე და მესამე ზომითი კატეგორიის კომპანიების 2018 წლის ფინანსური ანგარიშგებების საფუძველზე.
რეპორტში წარმოდგენილია დარგის საშუალო ფინანსური მაჩვენებლები, რომელიც აყალიბებს დარგის “ბენჩმარკს” და იძლევა ინფორმაციას მის ფინანსურ მდგომარეობაზე.
მეთოდოლოგია
კვლევაში გამოყენებული მონაცემები აღებულია ანგარიშგების პორტალის ვებგვერდიდან, სადაც ხორციელდება საქართველოს კანონმდებლობის შესაბამისად წლიური ფინანსური ანგარიშგებების გამოქვეყნება.
მოცემული კომპანიები ეკუთვნის პირველი, მეორე და მესამე ზომით კატეგორიებს, აქედან აუდირებულია მხოლოდ 3 კომპანია. აღნიშნული ინფორმაცია ეყრდნობა 2018 წლის მონაცემებს, ყურადღება გამახვილებულია ბაზრის ლიდერ კომპანიებზე, რომელთა რაოდენობაც შეადგენს 19-ს.
კვლევაში ყურადღება გამახვილებულია რძის პროდუქტების ბაზრის მიმოხილვაზე, კონკრეტულად კი რძის წარმოებასა და ექსპორტზე, მონაცემები აღებულია საერთაშორისო სავაჭრო ცენტრის ვებგვერდიდან.
კვლევის შედეგები
კვლევა მიმოიხილავს რძის და რძის პროდუქტების მწარმოებელ და მოვაჭრე კომპანიებს , რომელთა ჯამური ბრუნვა აღემატება 296 მილიონ ლარს, აქტივების ჯამი 133 მილიონ ლარს, ხოლო ჯამური მოგება დაბეგვრამდე აღწევს 14 მილიონ ლარს. კვლევამ გამოავლინა ინდუსტრიის ლიდერი კომპანიები შემოსავლების, აქტივებისა და მოგების მიხედვით.
მონაცემების ანალიზის შედეგად დადგინდა, რომ ქართულ კომპანიებს რძისა და რძის პროდუქტების წარმოების ინდუსტრიაში გააჩნიათ შემდეგი ფინანსური მაჩვენებლები: მოგებამ აქტივებზე საშუალოდ შეადგინა (ROA) 10%, მოგებამ კაპიტალზე კი (ROE) 32%.
გარდა ამისა, დადგინდა ფინანსური კოეფიციენტები ინდუსტრიის საშუალო ლიკვიდურობის, ეფექტურობისა და გადახდის უნარიანობის შესახებ. აღსანიშნავია ასევე რაოდენობა კომპანიებისა (5 კომპანია), რომლებმაც წელი ზარალით დასრულეს, რაც დარგში არსებულ კონკურენციაზე მიუთითებს.
კვლევის შედეგად ასევე გამოვლინდა 2018 წლის კომპანიების საშუალო მონაცემები კატეგორიების მიხედვით. მოცემული 19 კომპანიიდან მხოლოდ ერთი ეკუთვნის პირველ კატეგორიას, ორი კომპანია ერთიანდება მეორე კატეგორიაში, ხოლო ნადარჩენი 16 კომპანია წარმოადგენს მესამე კატეგორიას.
რძის პროდუქტების ინდუსტრიის კვლევის სრული ვერსიის სანახავად გადადით ბმულზე
ასევე იხილეთ კვლევა საქართველოში ღვინის ინდუსტრიის განვითარების შესახებ